Aretxabaletakoekin batera izan dira Eskoriatzakoak eta Arrasatekoak eta horiei batu zaizkie Soraluze aldetik etorritako hainbat eta Oñatikoren bat edo beste. Goiz parteko kalejirarekin hasi dute ospakizuna, eta eguerdian, borobildu komentuko lorategiko emanaldiarekin.
Biribilketak, esaterako Manuel Gainzak konposatutako Gainza jo dute, baita zortzikoak, arin arinak eta habanera herrikoi bat eta polka ere, besteak beste. Loramendi taldeko kide Jokin Antxiak azaldu du 2025ean bi ekitaldi garrantzitsu nabarmendu direla Aretxabaletan txistuaren bueltan. Batetik, aurten bete den Txino dantzaren 50. urteurrena prestatzeko lanetan dantza horren partitura ezezagun bat bilatu izana, 1953koa; eta bestetik, txino dantzarekin estuki lotuta dauden bi erraldoi berri –Txin eta Txin– iritsi izana Aretxabaletan sortu berri den Erraldoien Konpartsara. Hala, lehenengoz jo dute txino dantza berezi hori gaur, eta ekitaldian, erraldoiak –Rita eta Demetrio– izan dituzte lagun.