Josu Uribarren (1962, Arrasate) Aretxabaletako Izozkitegi dendako eskarmentu handiko izozkigileak ateak itxi ditu. Erretiroa hartu berri, azken produkzioko izozki guztia salduta, makineria guztia eta Izozkitegiko lokala garbitzen ari da egunotan, urriro egiten duen moduan, denboraldia amaitu berri. Izozkiak egiteko sasoi berria apirilean hasiko da, eta oraindik ez daki erreleborik izango duen edo makineria guztia saldu beharko duen.
Nola hasi zinen?
Ikasle hain ona ez izateagatik hasi nintzen izozkiak egiten. Aitak Jose Mari Ormaetxearekin hitz egin zuen, eta hark eman zion izozkitegia irekitzeko ideia. Hala, aitak eta nire osaba batek Arrasateko izozkitegia ireki zuten, eta ordutik 40 urte daramatzat izozkiak egiten. Han anaia geratu zen… Ni Aretxabaletan duela 33 urte hasi nintzen; hemen gozotegia zegoen, eta urte askoan obradore bezala egon da; izozkitegi bezala, berriz, zazpi urte daramatzat. Gero, urte askoan Arrasaten egiten genuen izozkia eta Aretxabaletara ekarri… makineria guztia ekarri genuen arte.
Nola ikasten du batek izozkia egiteko lanbidea?
Gaur egun eskolak daude. Nire kasuan, 22 urterekin hasi nintzen lanean, Errenteriako izozkitegi batean. Han oinarrizkoa ikasi nuen, eta ordutik ikastaro ugari egin ditut urte hauetan guztietan. Duela urte batzuk, esaterako, Angelo Corvitto izozkigile italiarraren ikastaro bat jaso nuen; izozki-teknikaren oinarriak ezarri zituen profesionaletako bat da, eta sekulako esperientzia izan zen. Horrekin batera, Zarauzko Carlos Arribasen saioetan ere asko ikasi dut. Azkenean, horrela hartzen da esperientzia.
Zein da izozkirik onena?
Batzuek italiarra dela diote, berau baita famatuena; baina nik uste dut errezeta on batekin eta produktu onarekin lortzen dela izozki on bat. Aretxabaletan harrera ona izan du urte hauetan guztietan gure izozkiak. Prozesuari dagokionez, labur esanda, lau pauso jarraitu behar dira: pasteurizazioa, mantekazioa, batimientoa eta izozkitze mantentzea. Horren baitan, lau azukre mota erabiltzen ditut nik, esnea, gurina…
Eta gehien saldu izan duzuna?
Aurten, guztira, 38 izozki mota egin ditugu. Denak saltzen dira oso ondo, baina badira batzuk gehiago eskatzen dituztenak. Klasikoak dira, batez ere, gehien saltzen direnak. Gazta-tarta zaporezkoa asko saldu dut, baita gazta, intxaur eta irasagarrarena. Horiekin batera, San Markos tarta zaporezkoa edo jogurtarena ere oso ondo saldu dira, baita hur-txokolatearekin eginikoa ere.
Makineria industrial ona izatea ere ezinbestekoa da izozki ona egiteko? Eta zer gertatuko da bertan duzun makineria guztiarekin? Eta Izozkitegirekin?
Carpillani markako puntako makineria dut Izozkitegin. Ez da onena, baina bai onenen artekoa. Nire kasuan, normalean, 80-100 litro izozki egin izan ditut egunean, eta norbaitek negozioa hartzea gustatuko litzaidake, baina ez edozein preziotan. Hau da, legatua ere garrantzitsua da, eta bertan produktu onarekin egindako izozkia egitea nahiko nuke, ez edozein modutan egindakoa.
Urte hauetan guztietan izan dituzun bezeroendako mezurik baduzu?
Izozkitegin bertan atean ere jarri dugu esker-mezua, eta hori bera azpimarratu nahiko nuke. Urte hauetan jasotako maitasuna, konfiantza eta fideltasuna eskertu nahiko nieke bezero guztiei.
