Iaz legez, Pisarzowice herria izango dute topaleku hainbat herrialdetatik joango diren neska gazteek. Han elkartuko dira Poloniakoekin batera, Turkiako Niñufer hirikoak, Alemaniako Wiesbaden-ekoak, Palestinako talde bat etan Aretxabaletakoak.
Astebeteko egonaldia egingo dute eta ahalduntzera bideratutako topaketa bat izango da. Herrialde desberdinetan neska izatea zer den, nola bizi diren, zein egoera bizi dituzten, eta, azken finean, neska izateak suposatzen duenaren gainean hausnartuko dute. Elkarrekin biziko dira zazpi egunez eta tailer eta hausnarketa saioez gain aisialdi ekintzak, irteerak eta bestelakoak egingo dituzte.
Bizipenen gaineko aurkezpena
Poloniatik bueltan, han bizi izandakoa partekatuko dute gaztelekuan gainerako erabiltzaileen, lagunen eta gurasoen aurrean. Gainera, datozen hilabeteetan nesken parte-hartzea bultzatzeko proiektu bat pentsatu eta garatuko dute; urrian hasi eta abendura bitartean ekintza bereziak antolatuko dituztela iragarri dute.
Erasmus + egitasmoa, Gipuzkoako Foru Aldundiko haur, nerabe eta gazteen sustapen sailak eta Aretxabaletako udalak bultzatu dute elkarlanean.