Gernika Palestina ekimenak elkartasun aktiborako egindako deiarekin bat egin du Aretxabaletako herritar talde batek eta irailaren 26rako, sanmigel jaiei hasiera emateko, argazki erraldoi bat ateratzera deitu ditu herritarrak; 19:00etan izango da, Durana kale barrenean, Herriko Plaza azpian.
"Palestinan gertatzen dabilen genozidioa salatuko dugu, eta era berean, elkartasuna adierazi palestinar herrialdeari" adierazi dute Aretxabaleta Palestinarekin herri ekimeneko kideek eta gaineratu: "Herritarrak sistematikoki hiltzen dituztela ikusten dugu egunero, inolako bereizketarik egin gabe. Hortaz, gizarte zibila mugitzeko garaia da, politikariak edo erakundeak ausartzen ez direna esateko". Eta herritarren konpromisoa eskatu dute, deialdia zabaltzeko norbere esparruan: "Edozein keinu txiki beharrezkoa delako han gertatzen ari dena salatzeko".
Bestetik, iaz legez, zapiak salduko dituzte sanmigeletarako. Postua jarriko dute egubakoitzean bertan, 18:00etan, udaletxe zaharraren aurrealdean.