"Aretxabaletako tomatea landatzen dugun lehenengo urtea izan da, eta begira, zer eta irabazi", zioen pozik Carlos Lopez Carlotek, epaimahaiko kideen eskutik sari bikoitza jaso ostean. Izan ere, lehiaketako sari nagusia jasotzeaz batera Aretxabaletako tomate onenaren saria ere jaso du aretxabaletarrak. Joxema Azpeitia legazpiarrak, Hilarion jatetxeko Gabino Yarza arrasatearrak, Uxue Bolinaga oñatiarrak eta Arteaga jatetxeko Maider Larrinagak osatu dute epaimahaia, eta lan dezente izan dute aurretik.
64 tomateren artean aukeratu dute onena
Gaurko lehiaketan 32 ekoizlek 64 tomate ezberdin aurkeztu dituzte, eta epaimahaiko lagunek lanak izan dituzte, denak dastatu behar zituzten eta. "Gainera, hemen ez dago gatz edo olio apur batekin laguntzerik, zaporea nahastuko genuelako. Lan zaila izan dugu, tomate asko izan ditugu, baina lan pozgarria izan da, hemen izan ditugun tomateak ez direlako supermerkatuetan aurkitzen ditugunak. Hiru onenak erabakitzea ez da izan erraza, usaina izan dugu kontutan, testura, ahoan gogorrak ala bigunak sumatu ditugun, oreka ote zuten gozotasunaren eta mikaztasunaren artean, eta amaitzeko, umami deritzona izan dugu kontutan, alegia, bosgarren zaporea, tomatea probatu ostean aho zapaian geratzen den zapore hori zelakoa zuten. Kontua ez da tomate hau gustatzen zaigun ala ez, lan handiagoa dago atzean, eta hori ikusita erabaki dugu zeintzuk ziren hamar onenak, eta horiek berriro dastatuta, onenak aukeratu ditugu gero. Egia da finalisten artean denak zeudela oso maila altuan", adierazi dio GOIENAri Joxema Azpeitiak.
Eta, behin lehiaketa amaituta, tomate guztiak dastatu ahal izan dituzte herritarrek.
Lehiaketako irabazleak
- Lehenengo saria: Carlos Lopez, Aretxabaletako tomatearekin.
- Bigarren saria: Juan Pedro Santos, Tio Vitorino barietatearekin.
- Hirugarren saria: Jose Lombide, Cherry tomatearekin.
- Laugarren saria: Ibon Bartolome, Aretxabaletako tomatearekin.
- Bosgarren saria: Agustin Beroiz, tomate larrosarekin.
- Seigarren saria: Juan Pedro Santos, peron tomatearekin.
- Zazpigarren saria: Jesus Mari Galdos Elorza, tomate larrosarekin.
- Aipamen bereziaren saria (Aretxabaletako tomateen artean): Carlos Lopez.
Tomatearen eguna Durana kalean eta plazan egin dute, 10:00etan hasita, antzinako tomate barietateen erakusketa egin dute, eta 11:00etan tomate haziak erauzteko tailerra izan da Marc Badalen eskutik; 12:00etan, berriz, tomate sukaldaritza tailerra eta dastaketa egon da plazan jarri duten postuan Anne Otegiren –seme gaztea laguntzaile izan duela– eskutik, eta jende askok jarraitu du Otaegik emandako tailerra, eta baita hark prestatutako jakiak probatu ere.