Uztailaren 10ean, eguena, San Kristobal eguna da, eta 19:30ean kanpai errepikekin adieraziko dute Larrinoko jaien hasiera. 20:00etan, berriz, meza izango da, eta, autoen bedeinkapenarekin batera, luntxa izango da bertaratuentzat. Horren baitan, autoa dotoreen apainduta eramaten duenak saria jasoko du, iaz egin zuten moduan.
Bazkaria norberak eramanda
Zapatuan, berriz, 11:30ean hasiko dute eguna, kanpai errepikarekin. Taberna ere irekiko dute, eta 12:00etan, herri kirolak eta betiko jolasak izango dira, haur eta helduentzat. 14:00etan, bazkaria egingo dute, eta nork berea eramango du. San Kristobal elkartean mahaiak izango direla adierazi dute antolatzaileek, eta mahaien erreserba uztailaren 9a baino lehen egin behar dela gaineratu dute. Erreserba egiteko, sankristobaljaixak@gmail.com helbidera idatzi beharko da.
Bazkalostean, 16:30ean, Larrinoko alebin mailako lehen pilota txapelketa egingo dute, eta 17:00etan, berriz, bola-joko txapelketa egingo dute gazte eta nagusientzat. 19:00etan, aldiz, erromeria izango da, Olgetan taldearen eskutik.
Erromeria, lehengo erara
"Aurten, Larrino auzoko jaietan San Kristobal elkarteak eta Udalak erromeria bat antolatu nahi izan dute lehengo erara, eta horretarako deialdi zabala egiten zaio herriari, denek parte har dezaten. Ekintzak guztientzat antolatu dira, eta taberna jarriko dugu, baita aparkalekua egokitu ere", adierazi du David Agirrek, Larrinoko auzo-alkateak.