Ikasturteari amaiera eman zaion honetan, haurrei zuzendutako eskaintza zabala egongo da uztailean zehar. Batetik, Udalak antolatu eta Loratu taldeak kudeatzen duen Uda Ikastaroa – ekainaren 30etik uztailaren 18ra–. Bestetik, UDAk antolatutako Gero sortuz futbol campusa –uztailaren 2tik 22ra–.
Asteazkenean emango diote hasiera Uda Ikastaroari, eta hiru aste iraungo du. Astelehenetik egubakoitzera, 09:00etatik 13:00etara bitartean izango da. Eguenetan, aldiz, 09:00etatik 17:00etara bitarte. Hasiera batean 300 haurrentzako lekua zegoen arren, 308 neska-mutikok disfrutatu ahal izango dute udako aisialdiaz. Egunero, guztiak Herriko Plazan bilduko dira eta egun horretan talde bakoitzak egingo duen ekintzaren arabera beste gune batzuetara mugitu beharko dute; besteak beste, Irabarrira, Galartzara, Kurtzetxikira eta Urkulura.
Guztira 32 hezitzaile izango dira 308 haur horien egunerokotasuna kudeatzeko ardura izango dutenak. Haiek askotariko ekintzak egiteaz arduratu beharko dira, haurrek ahalik eta hoberen pasa dezaten. Aretxabaletako udaleku irekien arduradun Ritxi Soaresek hauxe azpimarratu du: "Begiraleak lanean dauden arren, eurek ere haurrekin batera ondo pasatzea oso garrantzitsua dela uste dugu. Umeei ere hori transmititzeko ezinbestekoa da; helburu handi gisa hartzen dugu udalekuan disfrutatzea".
Euskara erdigunean
Loramendi Euskara Elkartea arduratzen da Uda Ikastaroaren kudeaketaz; hori horrela, elkarteak dituen balioak bultzatzen ditu. Hala, helburu nagusia da "euskara ardatz edukita haurren ongizatea bilatzea", dio Soaresek. Hiru aste horietan ekintza ugari egiten dituzte, askotariko adin tarteei egokitutakoak: igerilekura joan, mendi zein bizikleta irteerak, herri kirolak eta abar.
UDAren 'Gero sortuz' futbol campusa
Uztailaren 2an emango zaio hasiera UDAk antolatutako Gero sortuz futbol campusari, uztailaren 22ra arte egongo da martxan eta Ibarra futbol zelaiaren instalazioetan izango da ikastaroa. 2012tik 2016ra bitartean jaiotako 99 neskamutikok parte hartuko dute, bederatzi begiralerekin batera. Futbola oinarri izango duen egitarauak ildo hezitzailea eta aisialdiko ekintzak uztartzea du helburu nagusi. Jarduerak astelehenetik ostiralera egingo dituzte; astelehen, martitzen eta eguenetan 09:30etik 16:30era elkartuko dira –egun horietan bazkaltzeko aukera eskainiko dute– eta eguazten eta egubakoitzetan, 09:30etik 13:30era bitartean.
Udalekuaz arduratuko diren begiraleen artean emakumeak egotea nahi zutela adierazi du Iker Gomezek, campuseko kudeatzaileak: "Garrantzitsua da haurrek erreferenteak izatea".
Futbola ardatz
Futbola erdigunean egongo den arren, denetariko jarduerak egin ahal izango dituzte haurrek. Besteak beste, teknifikazio entrenamenduak, txapelketak eta irteerak. Ondo pasatzearekin batera, balioak transmititzea dute helburuen artean.