Enplegua lortzeko eta enpleguari eusteko orduan gaitasun digitalek genero-desberdintasunean nola eragiten duten aztertu dute Huhezi fakultateko Digitalizazioko eta ZTIMeko –Zientzia, Teknologia, Ingeniaritza eta Matematika– ikerketa taldeak, eta "arazo horri erantzuteko ekosistema digital bat" garatu dute: "Eskualdeko emakumeen enplegagarritasuna hobetzearren, doako tresna eskuragarri eta pertsonalizatu bat".
Bada, hori aurkeztuko dute egubakoitzean, ekainaren 20an, Aretxabaletako campusean, 09:00etan hasita. Proiektuaren aurkezpen ofiziala egingo dute lehendabizi, eta mahai-inguruak hartuko dio lekukoa 10:00etan, proiektuaren parte izan direnekin: Nagore Ipiña, Huheziko dekanoa; Olaia Gerrikabeitia eta Zuriñe Galartza, Debagoieneko Mankomunitateko lan-orientatzaileak; Leire Arregi, oinarrizko digitalizazioan espezializatutako hezitzailea; Sonia Etxenausia, Emun-eko berdintasun eta genero gaietarako aholkularia; Maria del Mar, ekosistema digitalaren erabiltzailea; Xabier Arnaiz, Bastida Akademiako ordezkaria; eta Loreto Susperregi, Gipuzkoako Foru Aldundiko Berrikuntza Zuzendaritzako zerbitzuburua.
Proiektuaren xehetasunak
Gipuzkoako Foru Aldundiak bultzatutako "kalitatezko enplegua sustatzeko" iazko deialdian kokatzen da proiektua, eta tokiko eragileak izan dituzte lagun: Emun, GoiSolutions, KZ guneak, Lanbide, Bastida Akademia eta Miguel Altuna lanbide-heziketako zentroa. Gaitasun digitaletan dauden prestakuntza-eskaintzak identifikatzen eta sailkatzen aritu da taldea azken hilabeteotan, helburu argi batekin: "Ekimen honekin, Mondragon Unibertsitateak eta bere bazkideek beste urrats bat egin nahi dute, genero-arrakala digitala murrizteko eta Debagoienean enplegu inklusibo eta ekitatiboago bat sustatzeko".