2026-2033 epealdirako Aretxabaletako Hiri Mugikortasun Iraunkorrerako Plana (HMIP) zehazteko helburuarekin Atxabaltan, kaleak denonak proiektua jarri zuen abian Udalak apirilean. Hainbat lan-saio egin ditu ordutik hona, eta gaur, ekainak 18, proposamenak aurkeztu eta ekarpenak jasotzeko bilera egingo du Arkupe kultur etxean, 18:00etan.
Udal Gobernuaren esanetan herriko mugikortasuna eta irisgarritasuna hobetzea da helburua eta prozesu hori herritarrekin batera landu gura du. Hala, orain arte egindakoen artean daude talde-elkarrizketak eta diagnostikoa egiteko lanketa-saioa, proposamenak jasotzeaz batera.
Bi saio horietan jasotako informazioarekin herriguneko hainbat lekutan mugikortasuna eta irisgarritasuna hobetzeko lehen proposamenak prestatu dira. Eta gaur proposamenak eta ekarpenak jasoko dituzte amaierako proiektuan txertatzeko.
Udal ordezkariek parte hartzera animatu dituzte herritarrak: "Zenbat eta parte-hartze zabalagoa, orduan eta aberatsagoa izango baita proiektua".
