Euskaraldiarekin bat egin eta izena emateko epea zabalik dago azken asteetan, eta Aretxabaletako batzordeak horretara animatu ditu herriko entitateak eta bizilagunak.
Online egin daiteke hori –euskaraldia.eus atarian sartuta– baina aurrez aurre ere bai. Horretarako, datozen hiru eguaztenetan mahaia aterako dute kalera; apirilaren 30ean eta maiatzaren 14n Durana kalean izango dira, udaletxe zaharraren aurrealdean, eta hilaren 7an, Mitarte kalean, 17:30etik aurrera. Dagoeneko izena emanda dutenek txapak bertan jaso ahal izango dituzte, baita Loramendi elkartearen bulegoan ere.
Hainbat antzezlan
Euskaraldiaren etorrera girotzeko hiru ikuskizun izango dira hurrengo astetan Udaleko Kultura Sailari esker. Euskaldungak antzezlana Tautelak Produkzioaren eskutik hilaren 9an, 20:00etan. Hazia, bidaia handi baten istorio txikia, Didau antzerki taldearekin hilaren 11n, 17:00etan. Eta Bingoz bingo, Yogurina Borova eta Aurori Badiola protagonista direla, hilaren 23an, 20:00etan.
Sarrerak laster jarriko dituzte salgai online.
