Argazkigintzari "balioa eman eta eta argazkilariei laguntzeko" asmoz abiatu zuen Aretxabaletako Udalak, iaz, Argazkia.eus lehiaketa, eta, izan zuen "harrera onak" bultzatuta, bigarrenez antolatu dute. "Arrakastatsua izan da aurtengoa ere, parte hartzeak gora egin du eta sariketa txalotzeko mezu asko jaso ditugu", dio Jardin Remoto ekimeneko Sandra Remonek.
Zortzi irabazle guztira
Euskal kulturari erpin askotatik begiratzen dioten askotariko argazkiak jaso dituzte, eta horietatik zortzi egileren lanak saritu dituzte (Ikus taula). "Denetarikoak daude: abandonatutako baserriak; mendiko artzaintza; langile-auzoetako bizimodua; arrantzarekin lotutakoak... Eta horiez gainera, esaterako, transexualitateari eta euskal emakumeei buruz jarduten duten erretratuak ere jaso ditugu".
Alberdik, 'Ondare' bilduma
Abandonatutako baserrien eta bestelako eraikinen argazkiekin sortu du Aretxabaletako Saria irabazi duen Ondare bilduma Jon Ander Alberdi argazkizaleak. "Aitortza oso polita da eta proiektuarekin jarraitzeko gogoa bultzatu dit. Aretxabaletakoak eta Eskoriatzakoak dira horiek, baina baditut eskualdean zein kanpoan ere beste batzuk begiz jota eta, akaso, egunen baten katalogo zabalagoa sortuko dut", azaldu du Alberdik.
Topaketa maiatzaren 10ean
Zaraia aretoan egingo dute erakusketa. Gustavo Bravo komisarioak gidatuko du bisita irekia eta han izango dira saritutako argazkilariak ere.
Lehiaketako atalak eta irabazleak
- Aretxabaleta Jon Ander Alberdi.
- Gipuzkoa Telmo Sanchez Ugalde.
- Araba Leonor Uriarte.
- Bizkaia Iñaki Izquierdo Muxika.
- Nafarroa Ainhoa Tejerina.
- Lapurdi Severine Dabadie.
- Nafarroa Beherea Camile Chopin.
- Zuberoa Eliane Heguiaphal.
