Euskaraldiaren enbaxadore izango diren hamaika laguneko taldea aurkeztuko dute jendaurrean udaletxe zaharraren aurrealdean. Musikak eta bertsoek girotutako ekitaldi xumea eta goxoa egin gura dute, herritarrak lagun dituztela. Eta ahobizi eta belarriprest rolak hautatzera gonbidatuko dituzte.
Ondoren, 21:30ean, bertso-afaria izango da, Hibai Gain elkartean, Maider Arregi, Ibai Alberdi, Ane Zuazubiskar eta Martin Berrizbeitia bertsolariekin; 70 bat lagun elkartuko dira mahaien bueltan.
Elkar mugituz egingo dugu! leloarekin dator euskararen erabilera aktibatu gura duen laugarren ariketa kolektiboa, maiatzaren 15etik 25era bitartean egingo dena, eta izena emateko epea dagoeneko zabalik dago –online egin daiteke: euskaraldia.eus–; hain zuzen ere, hamaikakoa osatuko duten lagunek horretara animatuko dituzte herritarrak.
