Nerabezaroa "erronkaz betetako etapa bat" da, eta hainbat dira pertsona nerabe bat "hobeto ulertzeko eta modu positiboan laguntzeko" tresna bila dabiltzan bidelagunak, hala nola gurasoak, tutoreak eta hezitzaileak. Bada, horretan laguntzeko asmoz egingo du hitzaldia Maitane Ormazabal psikologoak Aretxabaletako Lanbide Eskolan, gako praktikoak emanez.
Euskaraz izango da saioa datorren astelehenean, hilaren 10ean, arratsaldeko seietan, baina itzulpen zerbitzua eskainiko da, Telegram bidez; horretarako, aplikazioa telefono mugikorrera deskargatu behar da aurrez, eta kaskoak eraman behar dira hitzordura. Horrez gain, aurrez izena ematea komeni da; batik bat bidelagunei zuzenduta dagoen arren, irekia da herritar guztiendako.
