Kiroletik Bagoaz Euskaraz sariak banatu zituzten atzo, eguena, Durangoko San Agustin Kultur Gunean eginiko ekitaldi batean, eta hautagaien artean zen Aretxabaletako UDA kluba; ez zuen sari nagusia eskuratu, baina aitortza, ordea, bai. Han izan zen Agurtzane Elkoro UDAko presidentea, eta euskarak klubean duen egoeraren berri eman zuen: "Aretxabaletarendako kirol elkarte garrantzitsu bat da, herrigintzan ekiten duena, eta euskara du hizkuntzatzat. Kirola da gure motorra, eta motor horrek bakarrik hizkuntza batean ulertzen du: euskaraz".
Eusko Jaurlaritzak bigarren aldiz antolatu du sariketa, "kirol munduan gertatzen diren euskararen aldeko praxiei prestigioa emateko asmoz", eta hiruna hautagai zeuden izendatuen artean lurralde bakoitzetik: Arabatik, Badaiotz Herri Kirol Elkarteko sokatira taldea, Arabako Pilota Federazioa eta Irati Anda; Bizkaitik, EBETE – Kirol Jarduerak, Alex Txikon eta Asier Villalibre; eta Gipuzkoatik Urola Garaiko Kirol Elkartea, Kirolari Gaittun eta UDA. Azkenean, Andarendako izan zen sari nagusia.
