Orain arte egindakoen artean daude auzoetako bide bazterrak garbitzea. "Oro, Larrino, Goroeta, Aozaratza, Bolinaga, Arkarazo, Apotzaga-Etxebarri, Galartza eta Isurieta auzoetakoak, batik bat, guztira 10 kilometro. Gainera, konpromisoa hartu nahi du Udalak auzoetako arekak, ahal den heinean, garbi mantentzeko", adierazi dute prentsa-ohar bidez.
Behin horiek eginda beste lan batzuk etorriko dira; adibidez, Galartzako dorrea inguratzen duen horma konpontzea eta Larrinoko frontoia eta txintxaunak berritzea.
Horiez gain, ur-hartune gehiago jarri gura dituzte auzoetan, suteei aurre egiteko: "Horretarako, suhiltzaileekin lanean ari da Udala; mantentze-lanetan laguntzeko, esaterako". Auzoetako bizilagunei formakuntza ematea ere asmoen artean dute.
Asfaltatze-lanak, abuzturako
Asfaltatze-lanak ere egin gura dituzte: "Oroko Agarre eta Galartzako Etxezuriko bideek asfaltatu beharra daukate. Goroetan, ostera, Errekabitarteko bidea konponduko da". Lan horiek abuztu alderako aurreikusi dituzte. Horiez gain, pista zein oinezkoentzako bideei ere helduko dietela gaineratu dute: "Zuloak konpondu eta beste hainbatetan pistak hormigoitu egingo dira".
Bukatzeko, argiteria publikoa zabaltzeko lehen pausoak eman gura dituzte: "Auzotarren aspaldiko eskaera da eta proiektu bat enkargatuko da horretarako, beti ere, auzo alkateekin adostuta". Udalaren helburua da "segurtasuna bermatzen duen argiteria" egotea.
