Abian da III. Aitor Sarasua bertsopaper lehiaketa, Bertsularien Lagunek eta Aretxabaletako Udalak antolatuta. Hiru maila osatu dituzte, adinaren arabera: helduek –2007a aurretik jaiotakoak– sei eta hamar bertso artean egingo dituzte; gazteek –2008 eta 2011 urte artekoak–, lau eta zortzi artean; eta umeek –2012 urtera artekoak–, bi eta lau bertso bitartean. Gaia, neurria eta doinua libreak izango dira guztientzat.
Bertsoak sekula argitaratu gabeak izango dira eta bertso sorta bakoitzaren doinua zehaztu beharko da.
Lanak otsailaren 21erako bidali beharko dira, honako helbide honetara: sarasua.lehiaketa@gmail.com. Epaiaren berri martxoaren 14an emango dute.
Bi sari maila bakoitzean
Sariei dagokienez, maila bakoitzean lehenengo sailkatutako biek jasoko dituzte: helduen artean, 300 euro eta 150 euro, hurrenez hurren; gazteen artean, Elkarren erabiltzeko 100 euroko eta 50 euro bonuak; eta umeen artean, kirol-jertsea eta kamiseta eta Xilaba txapelketako finalerako sarrerak.
Oinarrien gaineko xehetasun guztiak Bertsozale elkartearen atarian daude.
