Jokin Antxiak hartu zuen omenduak banan-banan aurkezteko ardura, eta euren gaztetako bizipen batzuk ere laburtu zituen. Hala, 90 urte bete dituzten aretxabaletar gehiago badira ere –1934an jaiotakoak–, ekitaldian izan ziren Anjel Loidi, Karmen Garitano, Jose Benito Ayastui, Ascension Miguel, Mari Karmen Elorza, Tomas Cantero, Candela Majadas, Sagrario Vicente, Miren Gaztañaga, Blanca Gonzalez, Luis Mari Beitia eta Doloren Arenaza. Denak aurkeztu ondoren Gari Iturbe alkateak eta Nerea Zubillaga Ongizate zinegotziak zoriondu eta zapiak jantzi zizkieten. Aurreskua dantzatu zieten Leizarra taldeko bi kidek eta Basotxoko kantu taldeak hainbat abesti eskainita eman zioten bukaera ekitaldiari.
