Lehenengo zatian ondo jokatu dute aretxabaletarrek. Taldea ondo kokatu da zelaian eta ondo mugitu du baloia, aukerak sortu ahal izateko. Hurbildu da Derioaren areara eta jaurtiketa batzuk egin ditu, arrisku handiegirik sortu barik.
Bigarren zatian, 60. minutuan aldatu da egoera. Deriok sartu du gola, eta UDAkoen estrategia hankaz gora geratu da. Taldeak lekua galdu du zelaian berdinketa lortzeko ahaleginean. "Jokalari gehiago sartu ditugu goian, gutxienez berdinketa lortzeko. Ez dugu lortu, baina oso pozik noa etxera. Beste batzuetan irabazi egin dugu, eta ez naiz gustura geratu. Gaur, bai. Oso pozik eta harro nago taldeak egindakoaz. Hau da bidea", azpimarratu du Calzonek.
Hurrengoa, Gasteizen
Atzoko partidua galduta UDAk 17 punturekin jarraitzen du sailkapenean, eta postu batzuk galdu ditu. Hurrengo jardunaldian Deportivo Alaves C taldea izango du kontrario, Gasteizen jokatuko den partiduan.
