Komunikabideetan publikatu dutenez, mugatik gertu atxilotu du gaur Frantziako Poliziak Zuhaitz Errasti preso ohi aretxabaletarra, gaur egun Aiherran bizi dena, eta elkarretaratzea deitu dute Angeluko (Lapurdi) jendarmeria aurrean, 20:00etarako. Atxiloketaren arrazoia zein izan den ez dute argitu berria eman duten hedabideek. EH Bai alderdiak ere eman du atxiloketaren berri X sarean eta bere askatasuna eskatu du. Argitaratutakoen arabera, egubakoitz eguerdian eramango dute epailearen aurrera.
Aretxabaletan ere deitu dute elkarretaratzea egubakoitzerako. Konponbide osoa orain! Zuhaitz askatu! leloarekin egingo dute, 19:00etan, Pagaldaixenean.
Zuhaitz Errasti aretxabaletarra 2009an atxilotu zuten Frantzian, eta 2012an zortzi urteko kondena ezarri zioten ETAren aparatu logistiko eta militarraren parte izateagatik. 2017ko urriaren 27an utzi zuten aske –hiru egun lehenago Espainiako poliziaren esku geratu zen Frantzian zeukan kondena beteta, Soto del Realera eraman zuten orduan–.
