Guztion ikastaroak guztiontzat izenpean hainbat formakuntza-saio antolatu ditu Gu Haziak Gara laguntza elkarteak; besteak beste, kakorratz-lanak, gurutze-puntua eta josten ikasteko saioak. Ikasketa prozesua baino gehiago dela zehaztu dute, atzean hainbat helburu daudelako. Apirilean hasita hiru hilabete iraungo dute ikastaroek eta izena emateko epea zabalik dago, 681 65 59 39 telefono-zenbakira deituta.
Lau helburu
Ekimenak lau helburu ditu, elkarteko kideen esanetan: belaunaldien arteko eta genero-aniztasuneko kulturen arteko harremanak sustatzea, giro ludikoan eta harmoniatsuan; gizarte-bazterketa jasateko arriskuan dauden pertsonen parte-hartzea normalizatzea herriaren bizitzan; arautu gabeko prestakuntza eskaintzea hainbat arlotan –joskintza, genero-ekitatea, kontsumo arduratsua, nekazaritza ekologikoa, kultura-aniztasuna, sukaldaritza, joskintza, estanpazioa...–; eta udalerrian borondatezko lana, sareko lana eta gizarte-kohesioa bistaratzea.
Ordaintzeko bi modu
Ikastaro guztiek prezio bat dute dirutan (90 euro) eta beste bat denboran (bederatzi ordu boluntario). "Ikastaroei balioa ematen zaien heinean, pertsonen denborari ere balioa ematen zaio; era berean, inor ez da baztertua sentitzen ordaintzeko dirurik ez izateagatik", adierazi dute elkartetik.
Urtean zehar gutxienez sei ikastaro emango dituzte, "erabiltzaileen nahiak kontuan" hartuta. Hala proposatu dituzte estanpazioa, kakorratz tailerra, joskintzako saioak eta gurutze-puntua. "Erabiltzaileei zein ikastaro emango luketen galdetuko zaie; horrela, bermatu egingo da gizarte-bazterketa arriskuan dauden pertsonen parte-hartzea eta boluntariotza sustatzea".
Ikastaroak
Estanpazioa
- • Apirilak 22-ekainak 17
- • Astelehenak (17:00-18:30)
Kakorratz-lanak
- • Apirilak 17-ekainak 19
- • Eguaztenak (17:00-19:00)
Joskintza: hasiera
- • Apirilak 23-ekainak 20
- • Martitzenak (17:00-18:30)
- • Eguenak (10:00-11:30)
Joskintza: proiektua
- • Apirilak 25-ekainak 20
- • Eguenak (17:00-18:30)
Gurutze-puntua
- • Apirilak 26-ekainak 21
- • Egubakoitzak (10:00-11:30)
Joskintza: konponketak
- • Apirilak 27-ekainak 22
- • Zapatuak (16:00-17:30)
