Arabaclick argazki jaialdiko Jardín remoto beka irabazi zuen 2022ko urrian Burgosek. Artistaren unibertso sortzailean barneratzen gaituzten erretratuek eta natura hilek osatzen dute erakusketa eta kaleetan harrapatutako irudiak eta barne mundua erakusten ditu.
Uneak harrapatzen ditu Burgosek bere kamerarekin. Gauza txiki asko gertatzen dira gure inguruan gu ohartu ere egin gabe eta une horiek kapturatzen ditu argazkilari gasteiztarrak. Kaleak, errepideak, parkeak, tabernak... Ustekabeko topaketa iheskorrak, non keinuak, begiradak eta uneak errepika ezinak diren.
Erakusketaren bisita gidatu azkarra egin zuen erakusketaren komisario eta argazki proiektuaren tutore Gustavo Bravok atzo Arkupe aretoan.
Erakusketa otsailaren 29a arte egongo da ikusgai Arkupen. Ordutegia da: astelehenetik egubakoitzera, goizez (11:00-13:00) eta arratsaldez (18:00-20:00); eta zapatuetan, goizez bakarrik.
