Joli Paskualena, Iker Huitzi, Santi Romano eta Karlos Nguema abeslariek osatutako Demode Quartet taldea bueltan dator Aretxabaletara, eta oraingoan, A kupela ikuskizuna eskainiko du.
Orain dela hamabi urte hasi zuen ibilbide taldeak eta musika ulertzeko modu dibertigarri eta berezia du, beti eginaz lekua umoreari eta jolasari. Ahotsa bada ere instrumentu nagusia beste batzuk ere erabiliko dituzte gitarra, pianoa eta beat box-a, esaterako.
2021ean, Kutsidazu bidea, Ixabel ikuskizuna sortu zuten, eta musika-ikuskizun onenaren Max Saria jaso zuten. 2022an, ostera, La Voz ekimenean hartu zuen parte, "erronka zaila eta aldi berean kitzikagarria" izanik.
Orain arte erabili ez dituzten esperimentu eta ahots-sorpresa batzuekin osatu dute A kupela, goi mailako 80 minutuko emanaldi dibertigarria.
