Artisautza, merkataritza eta bertako askotariko produktuen topagunea izango da Durana kalea zapatuan eta domekan. Postuak, 27 guztira, 11:00etatik 15:00etara bitartean izango dituzte zabalik bi egunetan.
Hamar artisau, lau ekoizle eta bost merkatari elkartuko dira, eta era askotako produktuak eskainiko dituzte: larruzko osagarriak, zilarrez egindako bitxiak, arropa, pintura-lanak eta jatekoa: eztia, ogia, hestebeteak, gozogintza… Lau elkartek ere hartuko dute parte: Hiruatx gobernuz kanpoko erakundeak, Gu Haziak Gara elkarteak, Zaporeak elkarteak eta UDAk.
Gainera, herriko artistei ere egingo diete lekua eta hainbat idazle aretxabaletarrek eurek idatzitako liburuak erakutsiko dituzte.
Gaur, buzkantzak
Azokaren aurretik, gaur, egubakoitza, buzkantzak dastatzeko aukera eskainiko dute UDAk eta Aretxartek. Herriko Plazan jarriko dute postua, 18:30ean.
