"Eskerrak eman nahi dizkizuegu zuen aletxoa eman zenuten guztioi, bai ekonomikoki baita animoz ere, jaietako txosnan bildutako diruaren lapurretak eragin zigun zorra kentzeko. Portajaiak Festen Elkarteko kide guztiok harro sentitu gara herriak, udalak, bailarak eta inguruak babesten gaituztelako". Hala adierazi dute gutunean.
Gaineratu dute, lapurretaren ustezko egileak hasiera-hasieratik identifikatuta eta salatuta daudela: "Justizia, zoritxarrez, nahiko genukeena baino motelagoa da. Guk borrokan jarraituko dugu dirua berreskuratzeko eta pertsona horiek horrelako ekintza penagarri eta patetiko bati merezi duten saria izan dezaten". Kontuari "amaiera justua" eman gura diote "emozionalki atseden" hartzeko.
2024a arte agurtu dira horrela: "Portasoleko jaiak antolatzeko elkartea harro eta indartsu dago zuei esker". Eta auzoa bizirik mantentzearen aldeko aldarria egin dute.