Antolatzaileen helburua da tratu onak sustatzea. "Berdinkideen arteko harremanetan bortizkeria ohiko bihurtu dela ikusi da. Irainak eta jolasetan egiten diren eraso fisikoak oso normalizatuta daude nerabeen artean", adierazi dute antolatzaileek. Horregatik, gaztelekuan, ludotekan eta hizkuntza errefortzu zerbitzuetan horren bueltan gogoeta egingo dute egunotan.
Jaialdia eta hitzaldia
Ekintza bi ere antolatu dituzte "tratu on horiek" bultzatze aldera. Gaur, azaroak 10, jaialdia egingo dute Herriko Plazan: 17:30ean, haurrei eta nerabeei zuzendutako ginkana izango da. Eta ondoren, 18:30ean, grafiti bat margotuko dute plazan, horretarako jarriko diren paneletan; Iban Urreta Etxeberria grafitigile aretxabaletarrak gidatuko du hori.
Martitzenean, azaroaren 14an, ostera, gurasoendako hitzaldia antolatu dute. Nerabezaroa eta komunikazioa izango da gai nagusia, eta Aretxabaletako Ikasiz zentroko Jone Galdos psikologoak emango ditu horren gaineko azalpenak; 18:00etan da, Arkupen.
