Joan den asteburuan Italian jokatutako Limone Extremeko lasterketarekin borobildu du Ainara Urrutiak denboraldia, eta Skyrunning zirkuituko lasterketetan batutako puntuei esker sailkapen orokorrean 9. postuan amaituko du urtea. Urrutiak pozik egoteko moduko denboraldia egin du, sailkapen orokorrean hamar onenen artean egotearekin batera, urtean zehar podiumera igo delako Madeiran, Grignen eta Louzanen.
Bada, joan den astean, Aretxabaletakoa 14.a izan zen nazioarteko puntako lasterkariak batu zituen lasterketan, Limoneko proba Skymasters proba zen-eta, alegia, final handia. Hala, Euskal Selekzioak korrikalari kuadrilla polita eraman zuen lasterketara, eta, aretxabaletarrarekin batera, Aitor Ajuria ere lasterketan izan zen, nahiz eta katarroa tarteko gatzagarrak gogotik sufritu behar izan zuen lasterketa amaitzeko (153.a izan zen). Urrutiarekin batera, Osak eta Kortazarrek ere bikain amaitu dute urtea; hirurak nabarmendu dira nazioartean.
