Kuku Miku guraso elkartea hasi da 2023-2024 ikasturtea gertatzen eta bazkidetza kanpaina jarri du abian. Aretxabaletako 0 eta 6 urte bitarteko haurrak dituzten familiei zuzendutako topagunea da, eta dagoeneko hamabigarren ikasturteari ekingo diote.
Izena emateko epea hilaren 11tik 24ra bitartean izango dute zabalik –kukumikuelkartea@gmail.com–. Eta Durana kalearen atzeko partean duten egoitza ezagutzeko eta hango jardueren berri emateko ateak irekiko dituzte martitzenean, hilaren 12an; gainera, Potx magoa gonbidatu dute hara, 17:30etik 19:00etara, egonaldia girotzeko.
Familiak protagonista
2012an zabaldu zituen ateak Kuku Mikuk hainbat gurasoren eskutik eta osasuntsu jarraitzen duela adierazi du Eneko Barberena Mondragonek, zuzendaritzako kideak: "Lortu genuen pandemia bezalako une zail bat pasatzea eta egun osasuntsu gaude. Dena den, beti da erronka handia lan boluntario hutsez jarduten duen elkarte bat bizirik mantentzea". Iaz 51 familia izan ziren bazkide, eta aurten antzeko kopuru batera iristea espero dute.
Urtean zehar hainbat ekintza antolatzen dituzte: hitzaldiak, ikastaroak… "Haur eta familiok ondo pasatzeko izaten dira, baita heziketan lagungarriak izan daitezkeenak ere. Bestalde, lokalaz gozatzeko aukera ere badugu", azaldu du. Lokala, poliki-poliki haurren beharretara egokitzen dihardutela gaineratu du, "material desberdina sortuz eta lortuz".
Horrez gain, hilero zerbait antolatzen ahalegintzen dira: "Bazkideen inplikazio eta motibazioaren arabera gauza gehiago edo gutxiago antola litezke urtero". Barberenak gogorarazi du autoantolatutako gunea dela eta familien inplikaziorik gabe ez lukeela aurrera egingo: "Zuzendaritza batzordean, ekintzen antolaketan, materialaren arduran edota garbiketan bertan familiak gara protagonista".