Baserri-auzoetan eta kaleko auzo-guneetan ibili dira jeltzaleak hauteskunde-programan zehaztutako proiektuen berri ematen: "Herritarrentzat eta herriarentzat proiektu zehatzez betetako proposamena dakar EAJk". Eta horietako hainbat gogorarazi dituzte: zaintza eta osasuna bateratuko dituen arreta zerbitzua, jubilatuen egoitza eta osasun etxea; institutu berria; Lausitta kalearen eraberritzea; baratze komunitarioak; kiroldegiaren aurrealdeko kalistenia eta aisialdi parkea; gazteendako, sorkuntzarako eta kulturarako baliabideak; merkataritza eta ostalaritzarako neurriak; eta Iturrigorri frontoia eraberritzea.
Horiek aurrera eroateko "lantalde bikaina" osatu dutela diote, "ideiaz beteta dagoena, gogotsu lanerako eta ilusioz gainezka".
Bozkatzeko gonbidapena
Hala, "merezi duelako" botoa emateak herritarrak hauteslekura gonbidatu dituzte: "Bozkatzera joan daitezela eskatzen diegu. Euren botoa zorrotza izan dadila eta sekula ere ez txeke zuria; botatzea bezalako keinu txiki batek Aretxabaletaren eta Gipuzkoaren etorkizunak baldintzatu ditzakeelako".
