Bigarrenez jokatuko da Artzain Txakurren Txapelketa Artxate elkarteak antolatuta, Udalaren laguntzarekin. Maiatzaren 13an izango da hori, 17:30ean hasita, Aozaratza auzoko zelai batean –Otala Zelai alboan–.
Artzainen esanetara lanean
Sei txakurrek erakutsiko dituzte ardiak gidatzeko trebetasunak, artzainen esanetara lan eginda. Lehiaketaren bultzatzailea den Javier Gastañaga aretxabaletarra izango da horietako bat eta lanaren nondik norakoen berri eman du: "Artzaina ezin da bere tokitik mugitu. Txakurrari emandako argibideei esker, igaro behar duten lekutik pasatzen dira ardiak, eta horrek txakurraren eta artzainaren arteko sintonia adierazten du". Hiru urte dituen border collie arrazako Cool txakurrarekin joango da aurten ere Gastañaga.
Zazpi minutuko ariketak
Etxekoarekin batera beste bost txakur izango dira nor baino nor gehiago: Mikel Aizpuruaren Txuli (Oiartzun); Manuel Gorritiren Turbo (Aizarnazabal); Mikel Garaiar Nahi (Zestoa); Pello Segurolaren Kai (Matxinbenta), eta Juan Ramon Azkargorta bizkaitarraren Bat. Parte-hartzaile bakoitzak zazpi minutuko bi ariketa egin beharko du.
