Apirilaren 29an ospatuko da Aretxabaletan Gazte Eguna, eta dagoeneko egitaraua prest dago. Egun guztirako ekintzak izango dira. Eguerdian egingo den bazkarirako txartelak gaur jarri dira salgai Urbaltz eta Ezkutu tabernetan hamar eurotan.
Ekintza-sorta zabala antolatu dute Atxabaltako Gazte Mugimenduko kideek. Egun guztirako plana 11:30ean hasiko da Herriko Plazan, eta 22:30etan hasiko diren kontzertuekin amaituko da. Berrikuntza gisa, bazkal ondoren bazkaloste musikatua egongo da JB bikotearen eskutik. Horrez gain, gazte jolas erraldoia ere egingo da.
Aretxabaletar eta eskoriatzarrek osatzen duten Oihu! taldeak disko berria aurkeztuko du eta taldearen parte diren Peio Uribetxeberriarentzat eta Iker Urtazarentzat azken kontzertua izango da Apirilaren 29koa.
Honako hau da prestatu duten egitaraua:
Egitaraua
• 11:30 Gazteen topaketa Herriko Plazan. Ondoren, Mural margoketa.
• 13:30 Gazte poteo girotua egingo dute.
• 14:45 Gazteen argazkia aterako da.
• 15:00 Gazte bazkaria. Txartelak salgai jarri dituzte 10 eurotan, Urbaltz eta Ezkutu tabernetan. Ondoren bazkaloste musikatua, eta jolasak.
• Arratsaldean, 'Izenbarekuak' txaranga gasteiztarrak herriko kaleak girotuko ditu.
• 22:30 Musika kontzertuak: Eten eta Oihu! talde aretxabaletarren kontzertuak.