Alderdiaren babesa jaso du Uribetxeberriak eta militanteek berretsi egin dute erabakia. Alkategaiak "gogotsu eta ilusioz" heldu dio erronkari, baita "proiektu sendoekin" ere: "Aretxabaletaren aldeko apustua egiten dugu eta gure herritarrekin konpromiso sendoa dugu". Aretxabaletarrekin eta hango eragileekin "elkarlanerako prest" agertu da hautagai jeltzalea, "guztion artean etorkizuneko erronkei arrakastaz aurre egiteko". Haren "hurbiltasuna, kudeaketa eraginkorra eta kemena" nabarmendu dituzte alderdikideek.
"Proiektu berriak" eskuartean
Azken urteetan herriak izan duen "hobekuntza" azpimarratu du hautagai jeltzaleak: "Begi-bistakoa da eraldaketa nabarmena izan duela, baina Aretxabaletak aurrera egiten jarraitzeko proiektu berriak ditugu, gizarte zerbitzuetan, ekonomian, jasangarritasunean zein udal ekipamenduetan".
Horretarako, "eskarmentu handiko" lantaldea izango du lagun: "Herritarren beharrak entzun eta haien eskaerei erantzungo diegu, ongizatea eta bizi-kalitatea hobetzeko proposamen, proiektu eta jarduera berriekin".
"Eskarmentua" duena
Udal kudeaketan "eskarmentua" du Uribetxeberriak hainbat agintalditan izan da-eta zinegotzi. Ingeniaritza Teknikoko ikasketak egin zituen eta Cegasa Taldean proiektu zuzendaria izan zen. Gaur egun, Kudeaketa eta Plangintza zuzendaria da Foru Aldundiaren Bide Azpiegituretako Departamentuan.