"Behin sakabanaketa politikarekin bukatuta prozesuaren fase berri batean sartu gara eta Aretxabaletan ere etxera ikurra duen zapia eramango dugu Muru mendi tontorrera. Argazkia aterako dugu han eta aldarrikatu etxeratzeko fasean gaudela", adierazi du Txarli Garciak, Sareko ordezkariak.
Ia preso guztiak Euskal Herrian egonda "lege arrunta" eskatzeko garaia dela uste du; horien artean daude graduen progresioa eta baimen bereziak: "Salbuespenezko legedia aplikatzen jarraitzen dute euskal presoei eta guk aldarrikatzen duguna da bere garaian sortutako lege bereziak bertan behera uztea eta lege arrunta ezartzea gainerako presoei bezala".
Gari "etxeratu arte"
Zaballan dagoen Garikoitz Garcia Arrieta preso aretxabaletarra izango dute gogoan bereziki: "Ia bi urte daramatza Zaballan, hamaika urte dispertsioan egon ostean. Gradu progresioa eskuratzeko baldintza guztiak beteta izan arren ez dugu ikusi inolako mugimendurik eta ez dugu ulertzen horren arrazoia".
Hori horrela, fase berriaren hasiera irudikatzera gonbidatu dituzte herritarrak domekan, Murura: "Preso guztiak etxeratu arte ez du bukatuko lana Sarek, hortaz, Gari etxean izan arte jarraituko dugu".