Performance ibiltaria eskainiko du Jaiki elkarteak hilaren 17an, Herrixan erosiz, eroso... eta ponpoxo! izenpean. Araba ibilbidean –Dagda taberna parean– abiatu eta Durana kalean bukatuko dute ikuskizuna. "Orain arteko performance handienetakoa izango da. Batetik, hamaika lagun elkartuko garelako dantzan, eta bestetik, lau lekutan egingo ditugulako geldialdiak, besteak beste, Asensio dendako erakusleihoan", adierazi du Maier Etxebarriak, Jaikiko kideak.
Aretxarteren eskaera
Aretxarte merkatarien elkartearen ekimena da. Izan ere, erabaki dute hilabeteko hirugarren egubakoitzetan kaleak girotzeko ekitaldiak antolatzea. "Martxoan izango da lehenengoa eta bertako talde batengana jo dugu hasteko", azaldu du Kristina Hernandezek, Aretxarteko presidenteak. Apirilean ere izango da ekitaldiren bat, hilaren 21ean hain zuzen ere.