Pertsona Atzerritarren Ohiz Kanpoko Erregulaziorako Herri Ekimen Legegilearen aldeko mozioa aurkeztu zuen Atxabaltako Mugimendu Feministak eguaztenean, martxoaren 8an, egindako ohiko osoko bilkuran.
Migratzaile eta errefuxiatuentzat migratzaile estatusa administratiboki erregularizatzea eskatu zuten egoitza eta lan-baimenak lortzeko. Udalbatzak aho batez onartu zuen mozio hura, eta, horrela, herri ekimen legegileari babesa erakutsi zion eta beste erakunde batzuetara zabaltzeko konpromisoa hartu zuen.
Zerbitzuen kontratu luzapena
Bestetik, Gizadi Laguntza Zerbitzuak enpresari etxez etxeko laguntza zerbitzuaren kontratua beste urtebete luzatzea ere onartu zuen udalbatzak. Baita Ibarra kiroldegian ematen diren hainbat zerbitzuren kontratua Athlon Kooperatibari luzatzea ere; besteak beste, kirol jardueren, sorosle zerbitzuaren, fitness gelako aholkularitza zerbitzuaren eta mantentze-lanen ardura.
