Hamabigarren urtez dator Aretxarte merkatarien elkarteak antolatutako Ixadebalde merkealdien azoka. Zortzi merkatarik hartuko dute parte eta martxoaren 2tik 4ra bitartean jarriko dituzte postuak denden aurrealdeetan; eguenean eta egubakoitzean goizez (10:00-13:00) eta arratsaldez (16:30-20:00) eta zapatuan eguerdira bitartean (10:00-14:00).
Denboraldiari bultzada
Arropak, oinetakoak eta osagarriak eskainiko dituzte zazpi dendak, eta zortzigarrenak, Hankabeltz urdaitegiak, jatekoa izango du salgai. "Urtero legez, udazken eta negu partean dendan geratutako jeneroa aterako dugu, prezio ezin hobeekin; mauka politak egongo dira", adierazi dute merkatariek. Eta azokarekin bultzadatxo bat eman gura diote denboraldi bukaerari. Eguraldi ona lagun izatea gurako lukete baina hala ez balitz karpekin babestuko dituzte postuak.
Bonuen zozketa
Bezeroei eskerrak emateko 100 euroko lau bonu zozketatuko dituzte: "Guk uste dugu herritarrek gustura hartzen dutela urtean birritan egiten dugun azoka; ea oraingoan ere harrera ona egiten diguten".
