Bizitakoa oraindik ahaztu gabe, Aretxabaletak atzean utzi ditu 2023ko Aratusteak. Kuadrillen desfilea festa izugarria izan zen, Santa Ageda neska-mutilek ez zuten hutsik egin eta egun osoan giro aparta bizi izan zen herriko kale nagusietan. Udaleko Kultura zinegotzi Ainhoa Caberoren balorazioa oso ona da: "Oso pozik gaude; izan ere, Aretxabaletako Aratusteak mundialak izan dira".
Caberoren ustez, eguna aurreikusi bezala ospatu zen. Mozorro aniztasuna, originaltasun handia eta umore ona izan ziren desfilearen hiru osagai nagusiak. Hala, honako hauek jaso zituzten sariak: Suge Xarmantak, Agrossfit, Irulegi, Alaska eta Mario Vaquerizo eta Urtebetetze Tarta. Karnabalen Lagunak Taldea ere bat dator Udalaren balorazioarekin: "Eguraldia lagun izan genuen eta giro aparta egon zen.
Aratusteetako lokalean sekula baino karroza gehiago prestatu dira". Ildo berean, 2024ko bazkari golfo-rako edukiera handitu egin gura dutela adierazi dute, inor txartelik gabe ez geratzeko. Eta datorren urteko Txapeltxin Egunerako ere berritasunak espero dira.
Aratuste-martitzenean ere ohiko jai-giroa bizi izan zen; goizean Kurtzebarri Eskolako eta Arizmendi Ikastolako haurrak dantzan aritu ziren Herriko Plazan; arratsaldean, aurtengo Santa Ageda neska-mutilek Txinen hiletarekin amaiera eman zieten aurtengo Inauteriei. 2024ko Aratusteak otsailaren 11n ospatuko dira. Gorde data, beraz, 351 egun falta dira eta.