Txistularien, trikitlarien eta gaiteroen laguntzarekin, euskal dantza tradizionalekin osatutako ikuskizuna eskaini dute gaur arratsaldean Aretxabaletako Ibarra kiroldegian Leizarra Musika Eskolako dantza taldeetako kideek.
Zortzi dantza talde daude guztira Leizarra Musika Eskolan, eta horietan, ehundik gora haur, gazte eta ez hain gazte dabiltza. Izan ere, txikienen taldean bost urteko neska-mutikoak dabiltza, eta gurasoen taldea ere badago. Denak mozorrotu dira lapurrez gaurko ikuskizunerako, eta bertaratutakoei txalo zaparrada ugari ostu dizkiete.
