Santa Ageda koplak kantuan hasteko "gertu" daude 75 bat kinto. Bihartik jardungo dute horretan, ikastetxeetara eta enpresatara joan ahal izateko: "Otsailaren 4an joan beharko genuke, baina aste bukaera izanik itxita egongo dira eta bisitak aurreratzea erabaki dugu. Jakinarazi ere egin diegu ikastetxeei; hortaz, gure zain izango direla uste dugu".
Domekan lehen dantza
Ohiturari eutsiz, bihar, auzorik auzo eta baserririk baserri ibiliko dira, goizean goiz irtenda, eta domekan kaleetan topatuko dituzte herritarrek kantuan. Aurtengo lehen dantza saioa ere orduantxe egingo dute, 19:00etan, Herriko Plazan; gero, beste bi domekatan errepikatuko dute. Azkena, otsailaren 19an, Aratuste-domekan.
Asteburuko ospakizunari hasiera emateko "gogotsu" daude gazteak, jakinik, gainera, eguraldi polita izango dutela lagun. Baina "urduri" ere badaude zenbait; bereziki, dantza saioari begira, badakite eta plaza bete egingo dela. Hainbat entsegu egin dituzte urtarrilean; eta azkena, entsegu orokorra txistulariekin batera, gaur iluntzean egingo dute.
Abesbatza eta Basotxo, bihar
Aretxabaleta Abesbatzako eta Leizarra musika eskolako abesbatzak ere kantuan ibiliko dira bihar, zapatua. 18:30 bueltan zaharren egoitzara joango dira eta gero kalerik kale jardungo dute koplak gogora ekarriz.
Basotxo erretiratuen elkarteko abestaldeak ere egingo du kantuan bihar: 19:00etan irtengo dira eta kale bazterrak alaitzeko asmoa dute.