Fermin Aioak zuzendutako Kepa Junkera Berpiztu dokumentalak trikitilari bilbotarraren ibilbide musikala jasotzen du, baita 2018ko abenduan iktusa jasan ondoren bere ibilbide oparoaren etena ere. Hilaren 9an (19:00) emango den ikus-entzunezko hori izango da otsaileko kultur egitarauaren "plater nagusia" Kultura Sailetik adierazi dutenez.
Horrez gain zine komertziala ere egongo da; helduentzako Living (otsailaren 3tik 6ra), Babylon (10, 12 eta 13an) eta Operación fortune: El gran engaño (24tik 27ra) filmak emango dira. Umeendako, ostera, honako hauek: El gato con botas: El último deseo (otsailak 4 eta 5), Hopper Oilaskoerbia (otsailaren 12an), eta Rabbit academy: Pazko arrautzen lapurreta handia (25 eta 26).
Antzerkiari dagokionez, Ortzai konpainia gasteiztarrak La Cenicienta ikuskizuna eskainiko du otsailaren 17an (19:00); Disneyren ipuin klasikoaren parodia da eta adin guztietarako egokia.
Ipuin kontaketa
Udal liburutegiak, bestalde, Onintze Goitiz narratzaile bilbotarra gonbidatu du umeendako ipuinak kontatzera; otsailaren 15ean, eguaztenean, izango da liburutegiko Txiki Txokoan (18:00). Izena aldez aurretik eman behar da eta horretarako epea otsailaren 2tik 14ra egongo da zabalik.
Blues doinuak
Musikak ere izango du lekua Zaraia aretoan. Iker Piris bluesman tolosarra etorriko da hilaren 23an (19:00) boogie-woogie doinuetaan aditua den Nirek Mokar gazte paristarra lagun hartuta.
Marta Larrañagaren erakusketa
Erakusketa aretoan Marta Larrañaga Azaldegi Donostiako artista plastikoaren lanak izango dira. Arte Ederretan lizentziatua da Larrañaga, pintura espezialitatean, hain zuzen ere.