Partidua hasi bezain pronto iritsi da etxekoen gola; Txinok bigarren zutoinera egindako erdiraketa baten bitartez, Unai Belokik lehen gola sartu du, eta markagailuan aurretik jarri eta hala iritsi dira Unai Calzonen mutilak atsedenaldira, 1-0.
Bigarren zatian, berriz, bi taldeak irten dira berdegunera garaipen gosez, baina neurketako bigarren gola, 83. minutua iritsi da. Irik jarritako erdiraketa bat Lagun Onak taldeko atzelariak bere atean sartu du. Horrela, 2-0 jarri da markagailua, etxekoen alde. Hortik minutu gutxira, 88.ean, area kanpotik lehen ukituan egindako jaurtiketa sareetara bidali du Mikel Ezeizak; 3-0.
Bolada onari eutsi beharrean
"Partidu zaila genuekan aurretik, eta egia esan, oso borrokatua, oso landua, eta zaila. Azken jardunaldietan emaitza onak izaten ari gara, eta, bolada on honi eutsi behar diogu", adierazi du partiduaren amaieran Unai Calzon entrenatzaileak.
Aloña Mendik galdu
Oñatiko Aloña Mendi taldeak Hernaniren aurka jokatu du ligako hemeretzigarren jardunaldia. Etxetik kanpora, kasu honetan ere puntu beharrean, baina, ezin izan dira garaipenarekin etxera bueltatu. 4-0 galdu dute, eta beraz, sailkapenean, hamabosgarren postuan jartzen dira.
Gol festa Lesakan
Emakumezkoen ohorezko erregional mailan Urolaren zelaian 3-0 galdu du Bergarak, eta atzealdean jarraitzen dute bergararrek. Lesakan, berriz, Beti Gazteren eta Leintz Arizmendiren partiduan gol festa izan da, 5-6 irabazi dute debagoiendarrek.