Aste bukaeran emango diote hasiera eskuz binakako Udaberri Saria pilota txapelketari eta Aretxabaleta kirol elkarteko hainbat jokalarik jardungo dute nor baino nor gehiago; horien artean, hiru partida Iturrigorri pilotalekuan izango dira (19:00).
Lehenengo jardunaldia etxean jokatuta hasiko dute kadete mailako bi bikotek: Manex Aranak eta Iker Ortuetak Lazkaoko Lapke elkartekoak izango dituzte aurrez aurre eta Xabat Otazuk eta Markel Errastik, Azpeitiko Ilunpe elkartekoak. Nagusiek ere, Aritz Zugastik eta Joxe Uribetxebarriak, etxean jokatuko dute; legazpiarren aurka, hain zuzen ere.
Horiez gain, infantil mailakoek Errendimenduko Gipuzkoako Txapelketari ekingo diote.
Bi partida kanpoan
Etxetik kanpora ere izango dituzte partiduak beste hainbatek: kadeteak Tolosara joango dira eta infantilak, Oñatira eta Amezketara.
