Idazle berriak bultzatzeko lehiaketa da Aretxabaletako Udalak eta Bergarako Idazle Eskolak elkarlanean antolatzen duten Karmele Igartua sariketa. Poesiari eskainia izan da aurtengoa, eta hemeretzi lan jaso dituzte, guztira. "Oso maila onekoak dira denak. Lehenengo galbahea hamar lanek pasatu dute eta amaierarako lau lan geratu dira", azaldu dute sariketako bultzatzaileek.
Obra bakarrean bilduta
Gidoiak eta ikastetxeetan lantzeko haurrentzako antzerki lanak idatzi zituen Igartuak, baina poeta moduan egin zen, bereziki, ezagun; horren erakusle, Espainiako Poesia Sari Nazionaleko finalista euskalduna izan zela haren azken liburua. Hiru liburu argitaratu zituen Igartuak; bada, bihar aurkeztuko duten Poesia bizitzeko eta sentitzeko modua izeneko argitalpenean obra bakarrean bildu dituzte Pamielaren eskutik.