Euskalgintzak eta euskarak berak azken hamarkadetan izan duten bilakaera handiak errealitatea erabat eraldatu duela oinarri hartuta, "gazte ikuspegi bat" eman nahi diote hizkuntza problematikari eta euskal kulturari Aretxabaletan. Behar horretatik sortu da Ixotu: "Egunero jasaten dugu zapalkuntza, sekulako zailtasunak ditugu egunerokotasuna euskaraz mantentzeko, eta euskalgintza gaurkotzeko beharra ikusten dugu", adierazi dute gazte mugimenduko kideek.
Izan ere, gazte mugimenduaren barruan kokatzen dute taldea, "baina herrian badaude Loramendi moduko euskara elkarteak, eta oso aberasgarria iruditzen zaigu horiekin lan egitea". Halako elkarlanei epe ertain-luzera begira heltzea da euren helburua; hori hala, datozen hilabeteotan "ekintza xumeak" egingo dituzte, kontuan hartuta "talde sortu berria" direla. Nabarmendu dute herrian sumatzen dutela euskaraz eta euskaratik bizitzeko gogoa, eta proiektuak jarraipena izango duela luzera begira.
Aurkezpenaren ostean, Eten hirukoteak kontzertua eman du, gitarra, baxu eta bateriak gogotik astinduz.
