Brasilen, Pernambuco; Mexikon, Puebla eta Yucatan; Ipar Afrikan, Tanger; eta azkenik, Haiti. Leku horietara egindako lan-bidaietako testu laburrez osatu du Jon Sarasua aretxabaletarrak Harizko zubiak liburua. Pamiela argitaletxearekin argitaratu du, eta gaur aurkeztu du Donostiako Udal Liburutegian.
Sarasuak bazter horietako gertakarien "marrazki-sorta moduko bat" islatu du; besteak beste, hizkuntza komunitate gutxituekiko harremanak. "Haitiarrak, nahuatlak, maiak, amazighak edota pernambucarrak munduaren ikarez mintzo dira orriotan, eta euskararen herriaren galdegaiak ez dira beti urruti". Hain justu, toki horietan jasotako ekintzen apunteek, egoerek eta lehen pertsonan idaztitako gogoetek osatu dute lana. "Ekiteko modu bat. Eta ekinaren alboan begiratzeko modu bat".
