Tokiko merkataritzari bultzada emateko asmoarekin eta Gabon sasoian herriko establezimenduetan erosketak sustatzeko bonu kanpaina jarri du abian Udalak, beste behin. Hala, abenduaren 1ean hasita 20+10 euro bonuak izango dira herritarren eskura. Erosleak 20 euro ordainduko ditu eta trukean hamar euro jaso, debalde. Aretxarte merkatarien elkarteko kide diren establezimenduetan –dendak, tabernak eta zerbitzuak– erabili ahal izango dira horiek abenduaren 31 bitartean.
Bonu bakarra
Aretxarteko kideak arduratuko dira hain zuzen ere horiek saltzeaz, eta Arkupe kultur etxera joan beharko da erostera, 13:00etatik 16:00etara bitartean; 16 urtetik gorako aretxabaletarrek erosi ahal izango dute –pertsona bakoitzeko bat–, NA aurkeztuta.
Udalak 5.000 euro bideratu ditu kanpaina horretara eta 500 bonu jarri herritarren eskura. Bonu guztiak salduz gero, gutxienez 15.000 euroko inpaktu ekonomikoa eragingo lukeela tokiko ekonomian adierazi dute.
