Ikastetxe-klik proiektua burutuko duten ikastetxeetako ordezkariak, udal ordezkariak eta Debagoiena 2030ko eta ekoONeko ordezkariak izan dira Aretxabaletan egin den aurkezpenean. Ikastetxe-Klik proiektua, Debagoienean trantsizio energetikoa sustatzeko Debagoiena 2030 ekimenak bultzatutako ‘Eraginez Piztu’ esku-hartze proposamenaren baitakoa da.
Oraingo ikasturte bukaerarako ikastetxeetako eraikinetako energia eta ur kontsumoak murriztea da helburua: horretarako, neurri eraginkorrak proposatu eta praktikara eraman beharko dituzte.
Energia taldeak sortuko dira geletan
Neurri horien proposamena eta jarraipena egiteko hezkuntza komunitateko kideez osaturiko Energia Taldeak sortuko dira ikastetxeetan. Energia taldean ikastetxeko langileak –izan irakasle, garbitzaile, jantokiko langile…–, gurasoak eta ikasleak egongo dira ordezkatuta. Horrek bultzatuko du murrizketan ez ezik, eskola komunitate osoaren kontzientzietan ere aldaketak eragitea.
Ikasturtean zehar landuko dira, batez ere, ohitura aldaketak eta horiek ahalbidetuko dute energia eta ur kontsumoetan murrizketa handiak. Urte bukaeran ikastetxeek lortuko duten aurrezpenearen %50 bueltatu egingo zaio ikastetxeari –Udalen babesari esker–, eta energia taldeko kideek erabakiko dute diru hori non inbertitu. Gainerako %50 inbertituko da efizientzia neurri berrietan.
Parte hartuko duten ikastetxeak
Hamar dira guztira Ikastetxe-Klik proiektuan parte hartuko dute ikastetxeak: Aretxabaletan, Kurtzebarri Eskola; Arrasaten, Arrasate Herri Eskola eta Arrasate Institutua; Arrasate eta Eskoriatzan, Arizmendi Ikastola (Almen eta Gazteluondo); Bergaran, Mariaren Lagundia eta San Martin Herri Eskola; Elgetan, Elgetako Herri Eskola; Eskoriatza, Luis Ezeiza Herri Eskola eta Oñatin, Oñatiko Instituta eta Elkar-Hezi ikastetxea.
