Urte borobila egin du Ainara Urrutiak (Aretxabaleta, 1981), eta domekan Urduñan jarri zion ginga, Euskal Kopako lineako azken lasterketa irabazita. Urrutiak egutegi betea izan du aurten, nazioarteko eta gertuko lasterketetan nabarmendu da, baina aretxabaletarrak EMF Kopako zirkuituko onena izan nahi zuen, eta helburu horrekin aurkeztu zen Urduñako lasterketako irteera puntura.
Bada, Aiaramendi Korrikalariak taldeko atleta lehen igoera gainditu ondoren hasi zen kontrarioak atzean uzten, eta alde hori handituz joan zen helmuga zeharkatu zuen arte. Urrutiak 3.24.04ko denbora egin zuen 18 kilometro eta 1.750 metroko desnibela zuen lasterketan, eta probaren errekorra ezarri zuen, bigarren sailkatu zen Irati Ortiz de Andari bost minutuko tartea aterata. Oihana Zubillaga izan zen podiuma osatu zuen hirugarren lasterkaria.
Kopa, poltsikora
Garaipen horrekin, eta lineako Euskal Kopako bost lasterketetan batutako puntuei esker –Kolazino Mendi Eguna, Kilimon Trail, Amurrio Trail, Labastida Trail eta Urduñako Mendi Lasterketa–, Urrutiak Kopa poltsikoratu du, eta beteranoen kategorian ere Aretxabaletakoarendako izan da garaikurra. Gizonezkoetan, berriz, Urduñan ere lehenengo sailkatu zen Asier Larruzearendako izan da Kopa. Mendiko lasterketen denboraldiari ezin zaio gehiagorik eskatu; orain, atseden hartzearekin batera asfaltozko lasterketa batzuk egiteko gogoz dagoela aitortu du aretxabaletarrak.
Malen Osa 'Harmailatik' saioan
Bestalde, astelehenean Harmailatik saioan Malen Osa izango da (21:30, 23:00, Goiena telebista) . Salomon etxeko atleta duela hilabete Madeiran (Portugal) egin zuten Golden Trail Series-etako finalean nabarmendu zen, bost etapak irabazita.
