Huhezinema euskal film laburren jaialdiraren 16. edizioak lanak aurkezteko epea ireki du, eta bidali ahal izango dira 2022ko azaroaren 29ra arte. Edizio honek data berriak izango ditu: urtarrilaren 25etik 27ra bitartean egingo da. Urtero bezala, laugarren mailako Ikus-entzunezko Komunikazio graduko 14 ikaslek osatutako talde berri batek antolatuko du jaialdia, eta unibertsitateko modulu baten parte izango da, Iban del Campo Mondragon Unibertsitateko irakasle eta jaialdiaren zuzendari artistikoaren gidaritzapean.
Edizioa berrikuntzaz beteta dator, publiko zabalagora iristeko helburuarekin. Aurreko edizioan bezala, Sail Ofiziala eta Bideoklip Saila mantenduko dituzte. Bestalde, orain arte MU Ikasle Saila izan dena zabaldu, eta, oraingo edizioan, Mondragon Unibertsitateko ikasleei soilik bideratu ordez, Euskal Herriko eta mundu osoko zinema edo ikus-entzunezkoen euskal ikasleen parte-hartzea bultzatuko du. Gainera, jubilatuz osatutako epaimahai batek sari bat emango du.
4.000 euro inguru banatuko dira irabazleen artean. Jaialdiaren oinarri eta sari eguneratuak eta informazio gehigarria ikusgai daude Huhezinemaren webgunean: https://huhezinema.eus/oinarriak/
