Herriaren iparraldeko sarreran, kuartel zaharraren parean, biribilgunea eraikiko du Foru Aldundiak. Hori kokatuko da GI-3920 errepidearen – Foru Aldundiaren jabetzakoa– eta Santakurtz, Otalora eta Bedarretako San Migel kaleen arteko bidegurutzean, eta ordezkatuko du gaur egun bi erditan zatituta dagoena. 80.000 euro inguruko aurrekontua bideratu dute horretara eta Excavaciones y Transportes Orsa enpresak egingo ditu lanak. Horiek urrian hasiko dira eta sei asteko epean amaitzea aurreikusi dute.
Aretxabaletako Udalak egin zion biribilgunea eraikitzeko eskaera Foru Aldundiari, herriko sarrera horretan abiadura murrizteko eta bide-segurtasuna hobetzeko helburuarekin.
Egungo diametroarekin
Biribilgunearen barruko eraztuna itxi egingo dute, ibilgailu guztiek ingura dezaten. Deuseztatutako galtzadaren zabalera 6,64 metroko errei batek eta 0,50 metroko barne-bazterbide batek osatuko dute. Erreien neurriak ere eman dituzte: GI-3920 errepidetik biribilgunera sartzeko zabalera 3,41 metrokoa izango da goranzko noranzkoan, eta norabide bereko irteerakoa, berriz, 3,56 metrokoa; beheranzko noranzkoan, 3,30 metroko sarrera eta 3,45 metroko irteera. Bi ertzak urbanizatuta daudela kontuan hartuta diseinatu dituzte zabalera horiek. 29,30 metroko egungo diametroa mantendu egingo da.
