Zapatuan, Aretxabaletako mendi bizikleta martxa egingo da. 09:00etan hasiko da, Herriko Plazatik, eta, parte-hartzaileek hiru ibilbide izango dituzte aukeran. Batetik, ibilbide motza: 30 kilometrokoa eta 1.200 metroko desnibelekoa; bestetik, ibilbide ertaina: 40 kilometrokoa eta 1.500 metroko desnibelekoa; eta, azkenik, ausartenentzat: 50 kilometroko ibilbide luzea eta 2.000 metroko desnibelekoa.
Parte hartu nahi dutenek hamabost euro ordaindu beharko dituzte eta izen-ematea plazan bertan egin ahal izango dute, 08:15etik 08:55era bitartean, proba hasi aurretik. Egongo diren sari nagusiez gain, kirol materiala ere zozketatuko dutela adierazi dute antolatzaileek.
Anoa-postuak
Ibilbide motza egingo duten partaideentzat anoa-postua egongo da 21. kilometroan eta ibilbide ertaina eta luzea egingo dutenentzat, berriz, 21. eta 33. kilometroetan. Antolakuntzak gaineratu duenez, ibilbideek aldaketak izan ditzakete eguraldiarengatik.